മലവെള്ളം പോലീയിട കവിതകള്
പലവക വന്നു പരന്നു കവിഞ്ഞൊരു
നിലയില്ലാതെ ചമഞ്ഞതു നമ്മുടെ
മലയാം ഭൂമിയെ മുക്കുകയല്ലേ.
അവശതയതുകൊണ്ടണയായ്വ്വാനിനി-
യവരവരളവിതു ചെയ്യണമിത്തിരി
കവികള്ക്കുപദേശം ചൊല്വതിനിതൊ-
രവസരമെന്നിഹ കരുതീടുന്നേന്.
മംഗളമണവതിനരുളുവതാണിതി-
ലുണ്ടൊരഹംകൃതിയോര്ത്തല്ലതുമ-
ല്ലാംഗലകവിയാം ഡ്രൈഡന് ചൊല്ലിയ-
തങ്ങിനെതന്നെ പകര്ത്തുകയത്രേ.
എഴുതും കൃതികളിലൊക്കെബ്ഭാഷയില്
വഴിയാംവണ്ണം ദൃഷ്ടി പതിക്കുവി-
നഴകെഴുമര്ത്ഥം വഴി മതിപൊങ്ങിയ
പൊഴുതിലുമണുവളവതു വെടിയായ്വ്വിന്
പാരമൊഴുക്കുണ്ടെങ്കിലുമര്ത്ഥം
ചേരുന്നേറ്റവുമെങ്കിലുമിഹ കൃതി
നീരസമാമപശബ്ദം തടവുകി-
ലാരിലുമറിക വെറുപ്പുണ്ടാക്കും.
കേള്ക്കുന്നവരശ്ലീലമതാമൊരു
വാക്യവുമിങ്ങു സഹിക്കാ കൃതികളില്
വായ്ക്കും ശബ്ദാഡംബരവും വക-
വയ്ക്കായ്വ്വിന് കൃത്രിമഭംഗികളും
ചൊല്ലാം ഭാരം ഭാഷാസൗഷ്ഠവ-
മില്ലാതെഴുതിവിടും കവിതകളാല്
ഇല്ലൊരു ഗുണവും എന്നല്ല നമുക്കതു
തെല്ലൊരു സുഖവും തരികില്ലറിവിന്;
ചിന്തിച്ചീടാന് സമയമെടുക്കാ-
തെന്തും ദ്രുതഗതിയായെഴുതായ്വ്വിന്
എന്തിനു വെറുതേ ദ്രുതകവിയാവാന്
ചിന്തയിതതിലൊരു കഥയില്ലറിവിന്!
('ലീല' എഴുതിയ നോട്ട്ബുക്കില് ആശാന് കുറിച്ചിട്ടിരുന്ന ഒരു തുള്ളല് കൃതിയാണ് 'കവികള്ക്കുപദേശം' എന്ന ഈ കവിത. 1912ല് എഴുതിയതാണെന്ന് കരുതപ്പെടുന്ന ഇത് DC Books പ്രസിദ്ധീകരിച്ച 'ആശാന്റെ പദ്യകൃതികള്' എന്ന പുസ്തകത്തില് 'ആശാന്റെ അറിയപ്പെടാത്ത കവിതകള്' എന്ന ഭാഗത്തുനിന്നുമാണ് എടുത്തിരിക്കുന്നത്. ശ്രീ.ജി.പ്രിയദര്ശനന് ആണ് സമ്പാദകന്.)
No comments:
Post a Comment