( വടക്കേ കൂട്ടാല നാരായണന്‍കുട്ടി നായര്‍ എന്ന VKNനുമായി നടത്തിയ അഭിമുഖം)
? താങ്കള്‍ കുഞ്ചന്‍ നമ്പ്യാരുടെ പുനര്‍ജ്ജന്മമാണെന്ന് പറയപ്പെടാറുണ്ടല്ലോ. ഇത് കേള്‍ക്കുമ്പോള്‍ താങ്കള്‍ക്ക് എന്താണ് തോന്നാറുള്ളത്?
= ഒന്നു തുള്ളാന്‍
? സാഹിത്യത്തില്‍ വന്നത് എങ്ങനെയായിരുന്നു?
= അക്ഷരങ്ങള്‍ വഴി
? ഒരു 'വി.കെ.എന്‍ ശൈലി' ഉണ്ടായതെങ്ങനെയാണെന്ന് പറയാമോ?
= പോക്കറ്റടിച്ചാണ്
? ഹാസ്യം സ്ഥിരമായി കൈകാര്യം ചെയ്യുമ്പോള്‍ ആവര്‍ത്തനവിരസത വരില്ലേ? എന്താണനുഭവം?
= ആര്‍ത്തവം നിന്നു.
? നിത്യജീവിതത്തില്‍ പലരും കാണാത്തത് എഴുത്തുകാര്‍ കാണുന്നു. അവരില്‍ പലരിലും കൂടുതല്‍ ചിലത് താങ്കള്‍ കാണുന്നു. ഈ നിരീക്ഷണ പാടവം ശീലിച്ചെടുത്തതാണോ?
= നാം മുക്കണ്ണനാണ്.
? ദേഷ്യം വന്നപ്പോള്‍ ഭര്‍ത്താവിനോട് തൂങ്ങിച്ചാകാന്‍ പറയുന്ന ഭാര്യ. ഭര്‍ത്താവ് തൂങ്ങിച്ചാവുകയും ചെയ്തു. അപ്പോള്‍ ഭാര്യയുടെ പ്രസ്താവം : 'ആള് പുത്തിമോശക്കാരനാര്‍ന്നൂങ്കിലും ഞാന്‍ പറഞ്ഞതിന് അപ്പറംണ്ടാര്‍ന്നീല്ല മീനാക്ഷ്യേ....അതല്ലേ എനിക്ക് ഒര്ദ്!" - ഈ ഭാര്യയ്ക്ക് മാതൃകയുണ്ടോ?
= മാതൃകാഭാര്യമാരില്ല.
? കഥാന്ത്യത്തില്‍ നല്‍കുന്ന ട്വിസ്റ്റിലൂടെ താങ്കള്‍ ഞങ്ങളെ ഏറെ ചിരിപ്പിക്കുകയും അതിലേറെ ചിന്തിപ്പിക്കുകയും ചെയ്യുന്നു. ഈ ട്വിസ്റ്റില്‍ താങ്കള്‍ എത്തുന്നതെങ്ങനെയെന്ന് 'പ്രേമവും വിവാഹവും' എന്ന കഥയെ ആസ്പദമാക്കി ഒന്നു പറഞ്ഞുതരാമോ?
= ഒലിവര്‍ ട്വിസ്റ്റ്‌ വായിച്ചിട്ടുണ്ട്.
? പ്രേമം ഹാസ്യത്തില്‍ കലര്‍ത്തിയപ്പോള്‍ കഥയിലോ സിനിമയിലോ കൂടുതല്‍ ഫലവത്തായത്?
= കഥകളിയില്‍.
? ഹാസ്യത്തിന് കാരിക്കേച്ചറുകള്‍ എത്രമാത്രം പ്രയോജനപ്പെട്ടിട്ടുണ്ട്?
= 'കാരിക്കേച്ചര്‍' എന്നുമതി. വേണ്ടത്ര.
? കഥാപാത്രത്തെ സൃഷ്ടിക്കുമ്പോഴോ വിവരണത്തിലോ സംഭാഷണത്തിലോ കൂടുതല്‍ ഹാസ്യം കലര്‍ത്താനാവുക?
= ഒരു പാത്രം കഥ എന്നേ പറയാവൂ. നളപാകത്തിന്.
? പാത്രങ്ങള്‍ വലുതാവുമ്പോള്‍ അവ സംഭവങ്ങളെ കടത്തി ഓടാറുണ്ടോ?
= ബാര്‍സിലോണ ഒളിംപിക്സ് കഴിഞ്ഞ് പറയാം.
? 'അതിശയോക്തി' എത്ര മാത്രം ചിരിക്കുപകരിക്കും?
= അല്പോക്തി വരെ.
? ത്രിവിക്രമനുണ്ണി നായരിലെ ചിരിയുടെ അടിസ്ഥാനമെന്തെന്നു ചോദിച്ചാല്‍ താങ്കള്‍ എന്തു പറയും?
= ഉണ്ണി നായരെപ്പറ്റി ചോദിക്കുന്നവനോട് ഒന്നും പറയില്ല. അവനെ പെരുമാറും.
? ഹാസ്യത്തെക്കുറിച്ച് താങ്കളുടെ സങ്കല്പം?
= അക്ബര്‍ പാദുഷായുടേത്.
? ബുദ്ധിപരമായ ഹാസ്യത്തെ കാണുന്നത്?
= കോങ്കണ്ണു കൊണ്ട്.
? ബൌദ്ധികമായ ആക്ഷേപഹാസ്യം സാധാരണക്കാരന് ഏശുമോ?
= സാധാരണക്കാരനെ പാംപറ.
? വി.കെ.എന്‍-ന്‍റെ രചനകള്‍ ഉള്‍ക്കൊള്ളാന്‍ അതിനുമുമ്പ് സാമ്പത്തികശാസ്ത്രവും രാഷ്ട്രീയവും സാഹിത്യവുമൊക്കെ അറിയണമെന്ന് പറയപ്പെടുന്നുണ്ടല്ലോ. എന്താണ് പ്രതികരണം?
= കരണക്കുറ്റിക്ക്.........
? കഥകളില്‍ ഒറ്റവാക്കിലോ വാക്യത്തിലോ ഒരു കാര്യം പറഞ്ഞുപോകുന്നത് ആസ്വാദകന് പൂര്‍ണ്ണമായി ഉള്‍ക്കൊള്ളാനാകുമോ?
= ആവില്ലെങ്കില്‍ വേണ്ട.
? 'ഒരു ദിവസത്തെ അത്താത്തുര്‍ക്കായിട്ടെന്തുകാര്യം നങ്ങേം' (നാണ്വാര്). ഇത് ഒരു സാധാരണ വായനക്കാരില്‍ നേരെ ചെല്ലുമോ?
= ചെല്ലുന്നില്ലെങ്കില്‍ ചെല്ലുംപോലെ ചെലുത്തുക.
? ഇതേകഥയില്‍ 'കാളിദാസന്‍ പറഞ്ഞ റൂട്ടിലൂടെയല്ലാതെ കണ്ണീരുകൊണ്ട് വയര്‍ നനയ്ക്കുന്നതില്‍ കവിതയില്ല.വര്‍ഷബിന്ദു, ത്രൂ പ്രോപ്പര്‍ ചാനലിലിറങ്ങി നാഭിയില്‍ നിന്ന് പൊട്ടിത്തെറിക്കണം.' - കാളിദാസനെയും ആ സന്ദര്‍ഭത്തെയുമറിയാതെ ഇതെങ്ങനെ ഏശും?
= കാളിദാസനെ വായിച്ചശേഷം മതി വേറെ വല്ലതും വിഴുങ്ങുന്നത്.
? അവന്‍സ്, ഉഷ്ണമാപിനിയമ്മ, ഫംഗസ് നായര്‍ - ഈ പുതിയ ഭാഷ സൃഷ്ടിക്കുന്നതിനു പിന്നില്‍?
= ഉന്മാദം.
? ഇംഗ്ലീഷല്ലാതെ ഫ്രഞ്ച് ഉദ്ധരിച്ച് കാണാറില്ല. ഫ്രഞ്ചറിയാമല്ലോ. പിന്നെ?
= ഫ്രഞ്ചിലെ പണി പഥ്യമല്ല.
? താങ്കളുടെ പയ്യന്‍ വളരെ പോപ്പുലറാണല്ലോ. എന്തായിരിക്കും കാരണം?
= ജനത്തിന്‍റെ ബുദ്ധിമോശം.
? പയ്യനെ ശരിക്കും പിടികിട്ടാന്‍ ആ കഥ മുഴുവന്‍ വായിക്കണ്ടെ?
= പോലീസില്‍ പരാതിപ്പെട്ടാലും മതി.
? പയ്യനു പിന്നിലെ പ്രേരണ? മാതൃക? പ്രോത്സാഹനം?
= കുന്തം, ചുരിക, കുറുവടി.
? പയ്യന്‍ കഥകള്‍ എഴുതുമ്പോള്‍ വല്ല പ്രത്യേക അനുഭൂതിയും?
= ഒരു ഭൂതവുമില്ല.
? പയ്യന്‍ കഥകളിലെന്നപോലെ നോവലിലുള്ള പരസ്പര പൂരകത്വത്തിന് കാരണം?
= ജ്‌ജാരാ ചോദിക്കാന്‍?
? ജനറല്‍ ചാത്തന്‍സും സര്‍ ചാത്തുവുമൊക്കെ പറഞ്ഞാല്‍ തീരാത്ത കഥയാണോ?
= അതെ.
? സര്‍ ചാത്തുവും നാണ്വാരും മറ്റും ശരിക്കുള്ളോരല്ലേ? ആരാണ്?
= വടകരയടുത്തുള്ളവരാണ്.
? മഞ്ചല്‍, ആരോഹണം, സിന്‍ഡിക്കേറ്റ്, ജനറല്‍ ചാത്തന്‍സ് - ഇതില്‍ ഏതു നോവലെഴുതുമ്പോഴാണ് താങ്കള്‍ ഏറ്റവും കൂടുതല്‍ 'പെയിന്‍' എടുത്തത്?
= പേനെടുത്തത് തല ചൊറിഞ്ഞിട്ട്.
? ഇന്ത്യന്‍ രാഷ്ട്രീയത്തിലെ മൂല്യത്തകര്‍ച്ച വിഷയമാക്കുമ്പോള്‍ 'അവസ്ഥകള്‍' ചൂണ്ടിക്കാണിക്കുക മാത്രമല്ലേ താങ്കള്‍ ചെയ്യുന്നുള്ളൂ? ഒരു പോംവഴിയും നിര്‍ദ്ദേശിക്കാനില്ലേ?
= ആ വഴി ഐ.എം.എഫിന് വിട്ടുകൊടുത്തിരിക്കുകയാണ്.
? തിരിഞ്ഞുനോക്കുമ്പോള്‍ ഏതെങ്കിലും അംശത്തില്‍ ദീര്‍ഘദൃഷ്ടിയില്‍ പിഴവുപറ്റി എന്നു തോന്നിയിട്ടുണ്ടോ? ശരിയായി എന്ന അഭിമാനമുണ്ടോ?
= തിരിഞ്ഞുനോക്കാറില്ല.
? താങ്കളുടെ കൃതികള്‍ സൂക്ഷിച്ചുവായിക്കുന്ന ആര്‍ക്കും താങ്കള്‍ ഒരു വലിയ ഭക്ഷണപ്രിയനാണെന്നു തോന്നും. ഇത് ശരിയാണോ? എപ്പോഴെങ്കിലും ഭക്ഷണമില്ലായ്മയോ കഴിച്ചുകൂടായ്മയോ ഉണ്ടായിട്ടുണ്ടോ?
= ഉറക്കത്തില്‍ പെരുത്ത്.
? താങ്കളുടെ കഥാപാത്രങ്ങള്‍ക്ക് പൊതുവെ ഭോഗാസക്തി കൂടുതലാണ്. ഇതിന്ന്‍ എന്തായിരിക്കും കാരണം?
= ഷണ്ഡനായതുകൊണ്ട്.
? മാര്‍ക്ക് ട്വയിന്‍, കര്‍ട്ടു വോണ്‍ഗട്ട്, വനഫൂല്‍ ഇവരിലാരോടാണ് കൂടുതല്‍ പ്രിയം? ഇവരോടോ മറ്റാരോടെങ്കിലുമോ മമതാബന്ധം തോന്നിയിട്ടുണ്ടോ? കാരണം?
= പേരുകള്‍ കഴിഞ്ഞോ?
? ചിരിപ്പിക്കുന്ന താങ്കള്‍ക്ക് ദുഃഖങ്ങളില്ലേ? നിശ്ശബ്ദദുഃഖങ്ങളുടെ ചിരിയാണ് താങ്കളുടെ രചനകള്‍ എന്നുപറഞ്ഞാല്‍?
= പറയുന്നവന്‍റെ ആരോഗ്യത്തിന് ഹാനികരമാണ്.
? പുതിയ തലമുറയില്‍ ഹാസ്യം നന്നായി കൈകാര്യം ചെയ്യുന്ന ആരെങ്കിലും ഉള്ളതായി തോന്നിയിട്ടുണ്ടോ? പൊതുവെ യുവകഥാകൃത്തുക്കളെക്കുറിച്ച് എന്താണഭിപ്രായം?
= മറ്റു പൈങ്കിളികളെക്കുറിച്ച് ചോദിക്കരുത്.
? 'വി.കെ.എന്‍ ആരാണ്?' എന്നു ചോദിച്ചാല്‍ വരുംതലമുറ എങ്ങനെ ഉത്തരം പറയണമെന്നാഗ്രഹം?
= എന്ത് പറഞ്ഞാലും വേണ്ടില്ല.
(ശ്രീ.അക്ബര്‍ കക്കട്ടില്‍, മലയാളത്തിലെ തന്‍റെ മുന്‍ഗാമികളുമായി നടത്തിയ അഭിമുഖങ്ങളടങ്ങിയ പുസ്തകമാണ് DC Books പ്രസിദ്ധീകരിച്ച സര്‍ഗ്ഗസമീക്ഷ. സാഹിത്യരംഗത്തെ 23 പ്രമുഖരുടെ അതിരസകരവും വിലയേറിയതുമായ സംഭാഷണങ്ങളാണ് ഈ പുസ്തകത്തിലേത്. ആ പുസ്തകത്തില്‍നിന്നുമാണ് VKNനുമായുള്ള ഈ അഭിമുഖം എടുത്തിരിക്കുന്നത്.)
