എങ്ങനെ ഞാന്‍ അറിയിക്കും - എന്‍ മനസ്സിനെ -
എങ്ങനെ ഞാന്‍ വെളിവാക്കും!
വാക്കുകള്‍ക്കുള്ളിലൊതുക്കുവാനാവില്ല
വിങ്ങുന്ന ഹൃത്തിന്‍ വികാരം - ഇതിനപ്പുറം -
എങ്ങനെ ഞാന്‍ അറിയിക്കും!
ഇഷ്ടം പറഞ്ഞറിയിക്കാന്‍
എന്‍ നാവിനിന്നെത്രയോ കഷ്ടം!
ആകാശത്തോളമല്ലതിനപ്പുറം
ആരോമലേ നിന്നോടിഷ്ടം - ഇതിനപ്പുറം -
എങ്ങനെ ഞാന്‍ അറിയിക്കും!
ഏറെ നാള്‍ കാണാതിരുന്നിട്ടും
ഏറിയെന്നുള്ളിലെ മൂകാനുരാഗം.
കാണി നേരം നിന്നെ കാണാതിരുന്നാ-
ലിന്നെന്തിനോ ഹൃത്തടം നീറും - ഇതിനപ്പുറം -
എങ്ങനെ ഞാന്‍ അറിയിക്കും!
(DC Booksന്‍റെ യൂട്യൂബ് ചാനലില്‍ കൊടുത്തിട്ടുള്ള ഒരു വീഡിയോയില്‍ നിന്നാണ് ഈ കവിത ലഭിച്ചത്. കവി തന്നെ ഈ കവിത ചൊല്ലുന്ന ഒരു വീഡിയോ ആണ്.
അതില്‍ കവി ഈ കവിതയുടെ ഉദ്ഭവത്തെപ്പറ്റി പറയുന്നുണ്ട്. 'ഒരു കവിത എഴുതിത്തരുമോ?' എന്ന് തങ്ങളുടെ പ്രണയത്തിന്‍റെ ആദ്യകാലത്ത് അദ്ദേഹത്തിന്‍റെ ഭാര്യ ചോദിച്ചതിനെത്തുടര്‍ന്ന് എഴുതിയതാണ് ഇത്. കവിതയെന്ന്‍ പറയാന്‍ പറ്റുമോ അതോ പാട്ടെന്നാണോ പറയാന്‍ പറ്റുക എന്നൊരു ചിന്തയും ആ വരികളും അദ്ദേഹം ഈ വീഡിയോയില്‍ പങ്കിടുന്നു.)
Ⓒ DCBooks
