Tuesday, March 21, 2023

ഗുരുപ്രണാമം


 

 

 

 

 

 

- ഗിരീഷ് പുത്തഞ്ചേരി

 

പാടാന്‍ പാടവമുള്ളൊരാള്‍...

പരശ്ശതം ഗാനത്തിന്‍റെ ജീവതന്ത്രിയില്‍

പ്രണവം ജനിച്ചൊരാള്‍...

 

സാരസ്വതത്തിന്‍റെയഗ്നികാണ്ഡങ്ങളില്‍

സാന്ദ്രാനന്ദാവബോധം തിരഞ്ഞൊരാള്‍...

 

കര്‍മ്മമാര്‍ഗ്ഗത്തിങ്കല്‍ കരുത്തുറ്റ കവിതയുടെ

ബ്രഹ്മസാക്ഷാത്കാരം ലഭിച്ചൊരാള്‍...

 

ദിഗ്ഭ്രമം ബാധിക്കും മനസ്സിന്‍റെയിരുളാര്‍ന്നൊ-

രഭ്രപാളിയില്‍ച്ചിത്രം വരച്ചൊരാള്‍...

 

സന്ധ്യാംബരച്ചെരുവില്‍ നില്‍ക്കുമ്പോഴും

സാധനയുടെ സാഗരത്തിരയ്ക്കുമേല്‍

സപ്തതിനിലാവുദിപ്പിച്ചൊരാള്‍...

 

ഏതോ പൂര്‍വ്വബന്ധത്താലെന്നെ

കവിതയുടെ ഗണിതം പഠിപ്പിച്ചൊരാള്‍...

ആ കര്‍മ്മയോഗിയുടെ കാല്‍ക്കലെന്‍ സാഷ്ടാംഗപ്രണാമം!

 

(മാതൃഭൂമി ബുക്ക്സ് പുറത്തിറക്കിയ ഗിരീഷ്‌ പുത്തഞ്ചേരിയുടെ കവിതകള്‍ എന്ന കൃതിയില്‍ നിന്നുമെടുത്താണ് ഈ കവിത ഇവിടെ ചേര്‍ത്തിരിക്കുന്നത്‌. അതുല്യകവിയും ഗാനരചയിതാവും സംവിധായകനുമായ യൂസഫലി കേച്ചേരിയുടെ സപ്തതിയാഘോഷ സ്മരണയ്ക്ക് എഴുതിയ കവിതയാണ് ഇത്.)