മനസ്സിനെ വശത്തു നിറുത്താന്‍ കഴിയുമെങ്കില്‍ അത്ഭുതകരങ്ങളായ പല പ്രവൃത്തികളും ചെയ്യാമെന്നുള്ള യോഗികളുടെ സിദ്ധാന്തം പ്രയോഗയോഗ്യമല്ലാത്ത വെറും പ്രതിജ്ഞകളുടെ കൂട്ടത്തില്‍ ഒന്നല്ല.
വിയന്നാ പട്ടണത്തിലെ ഒരു ആസ്ത്രിയന്‍ ഡോക്ടറുടെ പരീക്ഷയില്‍ പെട്ട ഒരു മനുഷ്യന്‍റെ അസാധാരണമായ മനശക്തിയെപ്പറ്റി അദ്ദേഹം ഈയിടെ ചില ഇംഗ്ലീഷ് പത്രങ്ങളില്‍ എഴുതിയിരിക്കുന്ന സംഭവം രസകരമാണ്. ഈ മനുഷ്യന് തന്‍റെ മനസ്സുപോലെ ഹൃദയത്തിന്‍റെ വലിപ്പത്തെ കൂട്ടുകയോ കുറയ്ക്കുകയോ ചെയ്യാനും അതിന്‍റെ സ്ഥാനത്തില്‍ നിന്ന് അങ്ങോട്ടോ ഇങ്ങോട്ടോ അതിനെ മാറ്റി വയ്പാനും കഴിയുമത്രേ. ഹൃദയത്തിന്‍റെ അടി മിനുട്ടില്‍ എണ്‍പതു വീതമുള്ളതു കുറച്ച് അന്‍പതാക്കുന്നതിനും, ഹൃദയപഞ്ജരത്തിന്‍റെ വലത്തേ കക്ഷ്യയിലോ മദ്ധ്യരേഖയിലോ ഹൃദയത്തെ ഇഷ്ടംപോലെ കൊണ്ടുവരുന്നതിനും അയാള്‍ക്ക് കഴിയും. ആദ്യത്തേതിന് അയാള്‍ അതിവേഗത്തില്‍ പോകുന്നു എന്നും രണ്ടാമത്തേതിന് തന്‍റെ ശ്വാസകോശത്തിന്‍റെ ഇടത്തേ ദളം മുറിഞ്ഞുപോകുന്നു എന്നും തന്നത്താന്‍ വിചാരിച്ചാല്‍ മതി. ശരീരത്തില്‍ ഏതു ദിക്കിലെങ്കിലും ചോര ഒലിപ്പിക്കാനും വീക്കമുണ്ടാക്കാനും അയാള്‍ക്ക് ഒരു പ്രയാസവുമില്ല. അവിടം തീപ്പെട്ടു പൊള്ളിയിരിക്കുന്നു എന്ന ഒരു വിശ്വാസം ബലമായി മനസ്സില്‍ അടിച്ചുകേറ്റിയാല്‍ മതി. ഈ അസാധാരണ മനുഷ്യന് തന്‍റെ കണ്മണികള്‍ രണ്ടും ഒരുമിച്ചോ വെവ്വേറെയായോ ഇഷ്ടം പോലെ ചെറുതാക്കുകയോ വലുതാക്കുകയോ ചെയ്യാനും കഴിയുമത്രേ.
ഈ വിദ്യയെ ശാസ്ത്രീയരീതിയില്‍ ക്രമപ്പെടുത്തി അഭ്യസിച്ചാല്‍ മനുഷ്യവര്‍ഗ്ഗത്തിന് അളവറ്റ ഗുണങ്ങള്‍ ഉണ്ടാവാന്‍ ഇടയുണ്ട്.
('കുമാരനാശാന്‍റെ സമ്പൂര്‍ണ്ണകൃതികള്‍ ഭാഗം : നാല്' എന്ന പുസ്തകത്തില്‍ നിന്നുമാണ് ഈ ചെറുലേഖനം എടുത്തിരിക്കുന്നത്. 'കുമാരനാശാന്‍ ദേശീയ സാംസ്കാരിക ഇന്‍സ്റ്റിറ്റ്യൂട്ട്' ആണ് ഈ സമാഹാരത്തിന്‍റെ പ്രസാധകര്‍. ആശാന്‍ ആരംഭിച്ച വിവേകോദയം മാഗസിനില്‍ കൊല്ലവര്‍ഷം 1086 മീനമാസത്തില്‍ പ്രസിദ്ധീകരിച്ച ലേഖനമാണ് ഇത്.)
No comments:
Post a Comment