നവവത്സരം, ഹാ, ഹാ! കേരളക്ഷമയ്ക്കുള്ളില്
നവചൈതന്യം ചേര്ക്കും മംഗളപ്രഭാരംഗം;
കാലശൈലത്തില്നിന്നും നിര്ഗ്ഗളിച്ചീടും പുത്തന്
ചോലയൊന്നിതാ ഭൂവില് പുളകം പൂശീടുന്നു;
ചന്ദനക്കുളിര്ക്കാറ്റിന്നിക്കിളിയിയറ്റുന്ന
തെന്നലിലൂഞ്ഞാലാടും പൂവല്ലീനിരയിലും,
അലസമലതല്ലിയുലയും പാടത്തിലെ-
പ്പവിഴക്കതിര്ക്കുലത്തുമ്പിലും തുളുമ്പുന്ന
സുസ്മിതസുധാരസം പാരിനോടോതീടുന്നു:
"വിസ്മരിക്കുവിന് പോയ കാലത്തെയഖിലരും."
കൊച്ചുപത്രങ്ങള് തുന്നിച്ചേര്ത്തിടുമാനന്ദം പോല്
പച്ചിലക്കാട്ടില് പാറിക്കളിപ്പൂ പറവകള്;
പൈതങ്ങള് തങ്ങള്ക്കോണത്തപ്പനെക്കണ്ടെത്തുവാന്
കൈവന്നൊരത്യാശതന്നാകാരസമാനമായ്
പയര്വള്ളിയില്നിന്നും വാനിലേക്കുയര്ന്നിട്ടു
പതറിയിളകുന്നൂ പൂമ്പാറ്റപ്പുതുപൂക്കള്;
മലയാളത്തിന് മഹാസൗഭാഗ്യപതാകപോല്
മലയാനിലനിങ്കലാടുന്നൂ പൊന്മേഘങ്ങള്;
ഭാവിയങ്ങൊരുപക്ഷേ,യിരുളാണെങ്കിലെന്തി-
ബ്ഭാസുരമഹത്തിങ്കല് പങ്കെടുക്കുവാനായി
കൂടുവിട്ടുണര്ന്നുടന് മച്ചിത്തവിഹംഗമേ!
കൂവി, നിന് കൂട്ടരോടുകൂടിയൊന്നാഹ്ലാദിക്കൂ!
(ഇടപ്പള്ളി രാഘവന്പിള്ളയുടെ സമ്പൂര്ണ്ണകൃതികളില് നിന്നുമെടുത്തത്)
No comments:
Post a Comment