ശാന്തസുന്ദരമയമായിടും ശരല്ക്കാല-
സാന്ധ്യരാഗാഭയെങ്ങും പരന്നിടുമ്പോള്,
പാര്വണശശിതന്റെ പാലൊളിപ്പട്ടുസാരി
പാരിടവധൂടിയെയുടുപ്പിക്കുമ്പോള്,
മെത്തിന കുതുകത്താല് പത്രികള് കളസ്വനാ-
ലെത്തിടും രജനിയെപ്പുകഴ്ത്തിടുമ്പോള്,
തന്നലക്കരങ്ങളാല് താളം പിടിച്ചുകൊണ്ടും;
വെണ്ണുരപ്പൂപ്പുഞ്ചിരി പൊഴിച്ചുകൊണ്ടും
ഉണ്മയിലലസമേ പാഞ്ഞിടും തടിനിതന്
വെണ്മണല്വിരിപ്പിട്ട പുളിനം തന്നില്,
ഏകനായിരുന്നതിതുഷ്ടനായ് തടിനിയും
നാകവും മാറിമാറിസ്സമീക്ഷിക്കുന്ന,
പ്രാകൃതരൂപനാകുമാദിപുമാന്റെ പരി-
പൂതമാം മനസ്സൊന്നു തുടിച്ചിരിക്കും;
മെച്ചത്തിലവന് തന്റെ മാനസമനന്തമാം
സച്ചിത്സ്വരൂപംതന്നില് ലയിച്ചിരിക്കും;
പെട്ടെന്നാ ഹൃദയമാം താരു വഴിഞ്ഞു പുറ-
പ്പെട്ടതാം മകരന്ദഝരികയല്ലോ;
വാഗ്ദേവിതന് നല്സ്തന്യപീയൂഷ,മല്ലെന്നാകി-
ലാദ്യസാഹിത്യമായിട്ടറിവൂ ലോകം.
No comments:
Post a Comment