ആനന്ദജീവിതം

- ഹെന്‍റി ഹൊവാഡ്, ഏള്‍ ഓഫ് സറി

ആനന്ദ ജീവിതം നേടാന്‍ സഹായക-

മായ കാര്യങ്ങളിവയാണെന്‍ സ്നേഹിതാ:

അത്തലില്ലാതെ ലഭിച്ച സ്വത്തും, ഫല-

വത്തായ ഭൂമിയും, ശാന്തചിത്തവുമേ;

തുല്യനാം ചങ്ങാതി; പോര്, പകയില്ല;

ഇല്ലാധിപത്യം, നിയമാനുവര്‍ത്തിത്വം;

വ്യാധിയില്ലാത്ത സുഖാവഹജീവിതം;

എന്നും തുടര്‍ന്നുപോം വീടും കുടിയുമേ.

സ്വാദിഷ്ഠമല്ലാത്ത സാമാന്യഭക്ഷണം;

ലാളിത്യമൊത്തുചേര്‍ന്നുള്ള വിജ്ഞാനവും;

ഉത്കണ്ഠയില്ലാത്ത രാത്രിയും, വീഞ്ഞിനാല്‍

വിക്ലിഷ്ടമാകാതെയുള്ള സംബുദ്ധിയും;

ദുസ്തര്‍ക്കമില്ലാത്ത വിശ്വസ്തപത്നിയും,

നക്തം സുഖപ്രദമാക്കും സുഷുപ്തിയും;

സംതൃപ്തിയെന്നും സ്വവസ്തുവകകളില്‍;

മൃത്യുവിന്നാശയോ ഇല്ല ആശങ്കയോ.

                                        

(മാതൃഭൂമി ബുക്ക്സ് പുറത്തിറക്കിയ ആംഗലേയ കാവ്യലോകം എന്ന പുസ്തകത്തില്‍നിന്നുമെടുത്താണ് ഈ കവിത ഇവിടെ ചേര്‍ത്തിരിക്കുന്നത്. ആംഗലേയ കവിതകള്‍ സമാഹരിച്ച് ഈ മലയാള വിവര്‍ത്തനം നടത്തിയത് ശ്രീ.പി കെ ആര്‍ നായര്‍ ആണ്.)