മോഷണം

 - കെ അയ്യപ്പപ്പണിക്കര്‍ 

വെറുമൊരു മോഷ്ടാവായോരെന്നെ 

കള്ളനെന്നു വിളിച്ചില്ലേ, താന്‍

കള്ളനെന്നു വിളിച്ചില്ലേ?

തുണി മോഷ്ടിച്ചതു കാണുന്നവരുടെ

നാണം കാക്കാനായിരുന്നല്ലോ - അവരുടെ

നാണം കാക്കാനായിരുന്നല്ലോ.

കോഴിയെ മോഷ്ടിച്ചെങ്കിലതേ, അത് 

പൊരിച്ചു തിന്നാനായിരുന്നല്ലോ - എനിക്കു

പൊരിച്ചു തിന്നാനായിരുന്നല്ലോ.

പശുവിനെ മോഷ്ടിച്ചെങ്കിലതും - എനിക്കു

പാലുകുടിക്കാനായിരുന്നല്ലോ - പശുവിന്‍

പാലുകുടിക്കാനായിരുന്നല്ലോ .

കോഴിയിറച്ചീം പശുവിന്‍പാലും 

വൈദ്യന്‍ പോലും വിലക്കിയില്ലല്ലോ - എന്‍റെ

വൈദ്യന്‍ പോലും വിലക്കിയില്ലല്ലോ.

നല്ലതുവല്ലോം മോഷ്ടിച്ചാലുടനേ-

അവനേ-

വെറുതേ-

കള്ളനാക്കും നിങ്ങടെ ചട്ടം.

മാറ്റുക മാറ്റുക ചട്ടങ്ങളെയവ

മാറ്റും നിങ്ങളെയല്ലെങ്കില്‍.