അകലം

      - അസ്മോ പുത്തൻചിറ

എന്നിൽ നിന്ന്
നിന്നിലേക്കുള്ള അകലം
ഒരു വാക്കാണ്‌.
പറയുമ്പോൾ 
മധുരവും
കേൾക്കുമ്പോൾ 
കയ്പും.

വാക്കിൽ നിന്ന്
പ്രവൃത്തിയിലേക്കുള്ള അകലം
ഒരു പ്രതിസന്ധിയാണ്.
മറ്റുള്ളവർക്ക് 
വലിച്ചുനീട്ടാൻ കഴിയുന്നതും
സ്വന്തമായി
ചുരുക്കാൻ കഴിയാത്തതും.

പ്രതിസന്ധിയിൽ നിന്ന്
പരിഹാരത്തിലേക്കുള്ള അകലം
ഒരു താൽപ്പര്യമാണ്.
സ്വന്തമായി
ഉണ്ടാവേണ്ടതും 
മറ്റുള്ളവർക്ക് 
ഉണ്ടാവാത്തതും.

താൽപ്പര്യത്തിൽ നിന്ന്
നിരാശയിലേക്കുള്ള അകലം
ഒരു നിലപാടാണ്.
ചിലർക്ക് 
വീണുകിട്ടുന്നതും
മറ്റു ചിലർ 
സ്വയം ഉണ്ടാക്കുന്നതും.

കരച്ചിലിൽ നിന്ന്
ചിരിയിലേക്കുള്ള അകലം
ഒരു ജീവിതമാണ്‌.
ആവശ്യപ്പെടാതെ
ലഭിക്കുന്നതും
ആവശ്യങ്ങൾ 
തീരാത്തതും.

(ഈയടുത്തിടെ നമ്മെ വിട്ടു പിരിഞ്ഞു ഈ എഴുത്തുകാരൻ. ഭാഷാപോഷിണിയുടെ 2006 ഫെബ്രുവരി ലക്കത്തിൽ വന്ന കവിതയാണ് ഇത്.)