പാടുന്നൂ വിഷുപ്പക്ഷികള്‍, മെല്ലെ
മേടസംക്രമസന്ധ്യയില്‍...
ഒന്നു പൂക്കാന്‍ മറന്നേപോയൊരു
കൊന്നതന്‍ കുളിര്‍ച്ചില്ലമേല്‍...
കാറ്റു തൊട്ടുവിളിച്ചു മെല്ലെ നിന്‍
കാതിലോരോന്നു ചൊല്ലവെ...
കേട്ടുവോ, നിന്‍റെ ബാല്യകാലത്തിന്‍
കാല്‍ച്ചിലമ്പിലെ മര്‍മ്മരം...
മാവുപൂത്ത തൊടികളും, മുറ്റ-
ത്താദ്യം പൂവിട്ട മുല്ലയും...
ആറ്റുതീരത്തിലഞ്ഞിക്കാവിലെ
ആര്‍ദ്രമാം ശംഖനാദവും...
നന്മ തോറ്റുവാനെത്തും പാണന്‍റെ
നന്തുണിപ്പാട്ടിന്നീണവും...
ഒറ്റത്താമര മാത്രം പൂവിടും
പുണ്യകാലപ്പുലരിയും...
രാത്രിയില്‍, മുളംകാട്ടില്‍ നിന്നാരോ-
മൂളും, ഹിന്ദോളരാഗവും...
സ്വപ്നത്തില്‍ മാത്രം കണ്ട ഗന്ധര്‍വന്‍
സത്യത്തില്‍, മുന്നില്‍ നില്‍പ്പതും...
ഏതോ ലജ്ജയാല്‍, നീ മുഖം, തുടു-
ത്താകെ വാടിത്തളര്‍ന്നതും...
ഓര്‍മ്മകള്‍, മഞ്ഞുപാളികള്‍ മാറ്റി
ഇന്നും നിന്നെ വിളിക്കവേ...
സ്നേഹസാന്ദ്രമായ് പൂക്കുന്നു, നീയീ
പാഴ്ത്തൊടിയിലെ കൊന്നപോല്‍...
(ശ്രീ. V K പ്രകാശ്‌ സംവിധാനം നിര്‍വഹിച്ച്, 2000ല്‍ പുറത്തിറങ്ങിയ പുനരധിവാസം എന്ന ചിത്രത്തില്‍ ഈ കവിത ഉള്‍പ്പെടുത്തിയിട്ടുണ്ട്. ഇത് സംഗീതം നല്‍കി ആലപിച്ചത് ശ്രീ. G വേണുഗോപാല്‍ ആണ്. അദ്ദേഹവും മകന്‍, അരവിന്ദ് വേണുഗോപാലും ചേര്‍ന്ന് ഈ കവിത (ഗാനം) ആലപിക്കുന്ന മറ്റൊരു വേര്‍ഷന്‍ ഇവിടെ ആസ്വദിക്കാം.)
No comments:
Post a Comment