ചിത്രം:
"മുഖമെവിടെ?"- ഞാന്‍ പകച്ചു ചോദിപ്പൂ:
മുനി പോല്‍ മൂകനായിരിപ്പൂ ചങ്ങാതി.
പനയന്നാര്‍ കാവിലെഴുന്നള്ളത്തിന്‍റെ
പടമെന്നോര്‍ത്തീയാള്‍ വരച്ച ചിത്രത്തില്‍
കൊടിയു,ണ്ടാനകള്‍, കുടതഴകളും,
കടുനിറം ചുറ്റിപ്പുരുഷാരങ്ങളും,
ഒരുത്തനുമെന്നാല്‍ മുഖമില്ലീ, വിദ്വാന്‍
മുഴുപ്പിരിയനോ, മഹാവേദാന്തിയോ?
ജാഥ:
ഇതെന്തതിശയം! പകലറുതിയില്‍
ഇളവേറ്റു പടിപ്പുരയില്‍ ഞാന്‍ നില്‍ക്കെ
ഒരു മഹാജാഥ കടന്നുപോയെന്നെ:
ശരായിയും കളസവുമണിഞ്ഞവര്‍
കമനീയമായ തലപ്പാവുള്ളവര്‍,
കഴല്‍വെയ്പില്‍ക്കടുക്കണിശമുള്ളവര്‍,
അവര്‍ നേതാക്കന്മാര്‍ നിമന്ത്രിപ്പൂ തമ്മില്‍-
""എവിടെ നിന്മുഖം?", "എവിടെ നിന്മുഖം?"
ഛായ:
ഉരുകുമെണ്ണയില്‍പ്പിടയും പാറ്റ പോല്‍
ഉഴലുമിപ്പാവം മഹാജനത്തോടു-
സഹതാപത്തിന്‍റെയുറവു വിങ്ങുമെ-
ന്നുയിരിന്നാഴത്തിലുരുളു പൊട്ടവേ,
മിഴിനീരൊപ്പാന്‍ ഞാനുയര്‍ത്ത കൈലേസ്സില്‍
തടയുന്നീലൊന്നും: ഇതെന്തു ശൂന്യത!
പിടഞ്ഞന്ധാളിച്ചു, വിറച്ച ഞാന്‍ മണി-
യറയില്‍പ്പാഞ്ഞെത്തിച്ചുമര്‍ക്കണ്ണാടിയില്‍
ഒരു നോക്കേ നോക്കീ;- എനിക്കും കോളറിന്‍
മുകളിലെന്തയ്യോ! മുഖമൊന്നില്ലെന്നോ?
No comments:
Post a Comment