വിക്ക്

  

 

 

- സച്ചിദാനന്ദന്‍

 

വിക്ക് വൈകല്യമല്ല.

ഒരു സംസാരരീതിയാണ്‌.

 

വാക്കിനും അര്‍ത്ഥത്തിനുമിടയ്ക്കു വരുന്ന

ചില മൌനങ്ങളെയാണ്

നാം വിക്കെന്നു വിളിക്കുന്നത്.

വാക്കിനും പ്രവൃത്തിയ്ക്കുമിടയ്ക്കുള്ള മൌനങ്ങളെ

മുടന്തെന്നു വിളിക്കുംപോലെ തന്നെ.

 

ഭാഷയ്ക്കു മുമ്പാണോ വിക്കുണ്ടായത്

അതോ ഭാഷയ്ക്കു ശേഷമോ?

ഭാഷയുടെ ഒരു പ്രാദേശിക വ്യതിയാനമാണോ വിക്ക്,

അതോ സ്വയം ഒരു ഭാഷയോ;

ഈ ചോദ്യങ്ങള്‍ക്കുമുമ്പില്‍

ഭാഷാശാസ്ത്രജ്ഞര്‍ വിക്കുന്നു.

 

ഓരോ കുറി വിക്കുമ്പോഴും നാം

അര്‍ത്ഥങ്ങളുടെ ദൈവത്തിന്

ഒരു ബലി നല്‍കുകയാണ്.

ഒരു ജനത ഒന്നിച്ചു വിക്കുമ്പോള്‍

അവരുടെ മാതൃഭാഷ വിക്കാകുന്നു;

ഇപ്പോള്‍ നമ്മുടേതെന്നപോലെ.

 

മനുഷ്യനെസൃഷ്ടിച്ചപ്പോള്‍

ദൈവവും വിക്കിയിരിക്കണം.

അതുകൊണ്ടാണ് മനുഷ്യരുടെ

എല്ലാ വാക്കുകളും ദുരൂഹമായത്

അതുകൊണ്ടാണ് മനുഷ്യരുടെ

പ്രാര്‍ത്ഥനകള്‍ മുതല്‍ കല്‍പ്പനകള്‍ വരെ

എല്ലാം വിക്കുന്നത്.

 

കവിതയെപ്പോലെ.